دوسابر تحت الضغط.. الناصري اجتمع معاه على ود تراجع نتائج الوداد وها القرار اللي تخاد في حق المترجي

الفرنسي سيباستيان دوسابر، مدرب الوداد البيضاوي كيشعر بالضغط هاد ليامات، خصوصا في ظل تراجع نتائج الوداد البيضاوي في البطولة.
سعيد الناصيري، رئيس الوداد اجتمع معاه البارح الأحد، باش يعرف منو شنو هي الأسباب الحقيقية اللي خلات نتائج الفريق تتراجع بشكل ملحوظ.
وحسب بلاغ الوداد، اللي تنشر في الصفحة الرسمية بالفايسبوك، فإن الإدارة قررت هاد الاجتماع تقييم المردود العام في المباريات الأخيرة والوقوف على الأسباب التقنية لهاد النتائج السلبية، خصوصا فالماتش ديال الدفاع الحسني الجديدي، اللي خسر فيه الوداد بواحد لزيرو في ملعب مركب محمد الخامس في الدار البيضاء، برسم الدورة 16 من منافسات البطولة.
وأكد البلاغ أن المكتب المسير قرر إحالة اللاعب زهير المترجي على اللجنة التأديبية، بسباب تصرفاته خلال وبعد نهاية مباراة فريق الوداد الرياضي ضد فريق الدفاع الحسني الجديدي.
تجدر الإشارة إلى أن الوداد مازال كيتصدر البطولة المغربية برصيد 33 نقطة إلى حدود الجولة 16، ويلعب على ورقة التأهل إلى نصف نهائي دوري أبطال إفريقيا، بمواجهته لفريق النجم الساحلي التونسي في دور الربع نهار 28 فبراير الجاري.