عاجل. مانولوفيتش مقلق من الناصيري بسبب التعاقدات لي ما فراسوش.. المدرب الصربي قرب يطير ودوسابر وغاموندي كيسخنو

علمت “كود”، أن الصربي زوران مانولوفيتش، مدرب الوداد البيضاوي، مقلق بزاف من الرئيس سعيد الناصيري، بسباب التعاقدات الأخيرة لي ما فراسوش.
وكشفت مصادر مقربة، أن مانولوفيتش لم يكن على علم باللعابة، لي جاب الناصيري، وما شاورو حد، يعني باختصار المفيد أن الناصيري ما مصوقش للمدرب الصربي.
هادشي كايعني أن رئيس الوداد عوال يطير المدرب فليامات القليلة جاية.
وحسب هاد المصادر، أن الناصيري كيستنى مانولوفيتش فالدورة باش يعلن رسميا إقالته، خصوصا بعدما حضر المدرب سيباستيان دوسابر للتيران نهار الماتش ديال بيترو أتليتيكو الانكولي في عصبة الأبطال الإفريقية نهار السبت لي فات.
وأصبحت ايام مانولوفيتش معدودة فالوداد، خصوصا أنه بدأ يشعر بالإهانة، بعدما تعاقد الناصيري مع 4 ديال اللعابة بلا ما يستاشرو.
وأكثر من ذلك أن الناصيري عوال يجيب ميگيل غانوندي المدرب السابق للحسنية أكادير باش يشرف على الإدارة التقنية، ومن بعد يصبح هو المدرب الرسمي للفريق العام حاي، لأن القانون كيمنعو دابا باش يدرب أي فريق في القسم الاول، بمعنى أن غاموندي ودوسابر غادي يتبادلو الأدوار العام الجاي.
وكانت “كود” سباقة إلى الحديث عن قرب تعيين دوسابر مدربا للوداد بلاصت الصربي مانولوفيتش، لي بدا كيحس بالتضييق على خدمتو من أجل إرغامه على الرحيل.