البوليس لقاو صحافي ميت فدارو نواحي تمارة

لبوليس ديال طلعة الشيخ الضاوي فتمارة لقاو لبارح الجمعة جثة صحافي متحللة بعدما دازت أيام على الموت ديالو، وحتى شي حد ما ساق ليه الخبار.
الصحافي المدعو مصطفى الكوكبي، اللي فعمرو 52 عام، لقاوه ميت فالشقة ديالو بحي 24 هكتار بطلعة الشيخ الضاوي، بعدما توصلو المقدمين بشكايات من عند الجيران اللي شمو ريحة غريبة، وشكو تكون وقعات ليه شي حاجة، خصوصا وأنهم دقو عليه وما رد عليهم حد.
الصحافي، اللي عاش سنوات فالشقة ديالو بوحدو، خدم فجريدة الاتحاد الاشتراكي ففترة سنوات الجمر والرصاص، ورجع دار جريدة ديالو جهوية سماها يعقوب المنصور، ثم موراها دار جريدة وطنية سماها الإصرار المغربي، قبل ما يولي كيشتغل مع مجموعة من المنابر “فريلانس”.
البوليس عاينو جثة الهالك وخداو صورتها قبل مايديوها لمستودع الأموات وإخضاعها للتشريح الطبي لتحديد ظروف وملابسات الوفاة.