الفوسفاط ما بغاتش تعطي مائة مليون ل”اخبار اليوم”. الجريدة كتموت واليومية: غاديين نمشيو للقضاء والتراب كيطوف المغرب مع بنموسى بنموذج تنموي جديد وهو ما بغاش يعطينا فلوسنا

علاش المكتب الشريف للفوسفاط اللي غير كيوزع فلفلوس وكيخدم فالصحافيين وبكثرة وبطريقة غريبة ما بغاش يخلص “اخبار اليوم”. الجريدة كشفت في عمودها “نقطة نظام” البارح الاربعاء 5 فبراير 2020 انه “في هذه اللحظات التي يطوف فيها حارس الثروة الفوسفاطية، مصطفى التراب، المغرب إلى جانب شكيب بنموسى مبشرا بنموذج تنموي جديد، يرفض سداد ديون مستحقة لفائدة «أخبار اليوم» في ذمة مكتبه الشريف”.
الجريدة كشفت انها حشمات تمشي للقضاء باش تخلص ففلوسها “خجلنا نحن من اللجوء إلى القضاء لاستخلاصها، ولم يخجل هو من المشاركة في إعدام الجريدة بحجبها”.
وفق مصدر من الجريدة ل”كود” فان هاد الشي قديم وقبل ما يتشد مولاها الصحافي توفيق بوعشرين اللي تحكم عليه ب15 عام فقضية غريبة مثيرة وحكم اغرب. مصدر”كود” قال باللي عندهم “بوند كوموند وعقد كان مع هاد المكتب” قيمة العقد وفق اخر ل”كود” فيه مليون درهم. مائة مليون سنتيم مهمة لهاد اليومية اللي كتعيش مشاكل ماشي حقاش ما فيدهاش ابدا بل حقاش كيف قال العمود كاين حصار عليها من قبل المعلنين.
مسؤولو اليومية وفق مصدر “كود” صبرو بزاف قبل ما هدرو على هاد القضية. دارو كاع المحاولات ولكن الفوسفاط ما تسوقوش ليهم