كأس الكاف.. الحسنية ضيع ربح فكوديفوار وحافظ على الصدارة

فريق حسنية أكادير ضيع الربح فكوت ديفوار فالماتش، لي جمعو اليوم الأحد بسان بيترو الايفواري بملعب "هوفييت بواني" بالعاصمة الإفوارية أبيدجان، برسم ثالث مباريات دور مجموعات كأس الاتحاد الإفريقي لكرة القدم.
الحسنية كان رابح فالشوط الاول بواسطة يوسف المحلي فالدقيقة 37، لكن سان بيترو غادي يماركي التعادل فالدقيقة 81.
الحسنية عانى بزاف ديال المشاكل فالشوط الاول، بعدما تضربو ليه 3 ديال اللعابة وغادروا التيران، ما قدروش يكملوا الماتش، الشيء لي خلا المدرب امحمد فاخر يدير تغييرات اضطرارية.
اللعابة لي غادروا التيران ف20 دقيقة الأولى هم ياسين الرامي ومالك سيسي وأمين الصادقي.
هاد المستجد الطارئ اثر على مردودية الفريق، خصوصا في الشوط الثاني، اللي اضغط فيه بقوة سان بيدرو الايفواري.
الماتش سالا بواحد لواحد، لكن الحسنية حافظ على صدارة المجموعة برصيد 7 ديال النقاط.