آفينك يا آيت طالب.. مرضى الكونصير متشبثين بالحياة وكيطالبو بالعلاج المجاني -تصاور

العديد من مرضى السرطان في المغرب دشنو حملة على فايسبوك بهاشتاكَ “مابغيناش نموتو بالسرطان. عطيونا حقنا في العلاج” باش يلفتو الأنظار لمعاناتهم مع الكونصير لي العلاج ديالو مكلف بزاف.
الحملة بدات نهار الجمعة من مراكش بعدما خرجات سيدة سميتها رجاء بفيديو كتحكي معاناتها اليومية مع المرض وكيفاش أن العلاج ماكاينش في المستشفيات العمومية وخاصها تكلف باش تحاول تعتق حياتها وهي الحالة المادية ديالها غير على قد الحال.
رجاء هي نموذج من بزاف ديال الناس لي كيعانيو في صمت، ولي قررو يلتاحقو بهاد الحملة لعل وعسى هاد المسؤولين في قطاع الصحة يلتافتو ليهم ويعطيوهم حقهم في العلاج المجاني.
الحملة والى حدود اليوم شاركو فيها المئات من مرضى السرطان، وكاين تضامن كبير وواسع معاهم، ودابا القضية وصلات وانتشرت في الانترنت خاص غير وزير الصحة يتفاعل معاهم.
“كود” تواصلات هاد الصباح مع مسؤول في وزارة الصحة ولكن لي بن لينا هو ان الحملة واخا وصلات ليومها الخامس الوزير والمسؤولين مازالين في دار غفلون، ومادار حتى تفاعل معاها.