من بعد الحملة لي دارو عليه ووصفوه ب”المغتصب المقزز”.. سعد لمجرد شاداه الخلعة وكيطلب صحابو يساندوه ويوقفو معاه

المغني سعد لمجرد كيحاول يبرد على راسو بعد الحملة لي دارو عليه السواعدة ولي عبرو في تويتر من خلال هاشتاكَ “#نرفض سعد لمجرد في رياض” عن رفضهم ليه ومبغاوش يغني في بلادهم، وقالو انهم كيرفضو مغتصب يجي عندهم، والقضاء مازال مقال كلمتو في القضايا لي مرفوعة ضدو من 2016.
التبرگيگة لي جابت “كود” من مصدر مقرب من لمجرد أنه طلب مساندة صحابو الفنانين باش يعلنو على الحفل ديالو فرياض لي غادي يكون في 18 من هاد الشهر، وبغاهم يعاونوه ويوقفو معاه باش يدوز كولشي بلا صداع.
لمجرد مخلوع وخايف لا مايجيش الجمهور ويبقا النجاح ديالو مرهون باليوتوب فقط.
وول البارح في عز الحملة لي نايضة ضدو، حط 3 ديال الفيديوهات الترويجية للحفلة لي غادي تكون فيها حتى مريم فارس وفرقة ميامي.