ايوب ومحمد واشرف مغاربة بلا اقامة احتجو دعما لاستقلال كاطالونيا طرداتهم اسبانيا. اليوم يوصل محمد واشرف مازال ما حسموش فتاريخ طردو

علمت “كود” ان مغربي يدعى محمد سيتم اليوم ترحيله من اقليم كاطالونيا الى المغرب. محمد كان مع 2 مغاربة خراين: اشرف وايوب. اللي كيجمعهم انهم كلهم بلا اوراق اقامة. وضعيتهم مازال وضعية حراگ٬ وكلهم احتجو فمدينة لايدا مع المطالبين بالانفصال فهاد الاقليم وباش تم اعتقالهم تقرر ترحيلهم.
ايوب كان اول المرحلين. شدوه طيروه للمغرب. دابا بقات حالة وحدة هي ديال اشرف. وفق مصدر ل”كود” فانه “مازال ما تحسمش فطردو”. دابا مازال فمركز كيديرو فيه الاجانب
دابا هادي طريقة جديدة بداتها السلطات الاسبانية مع المهاجرين لكثار اللي ما عندهمش اقامة فهاد لبلاد. اللي طاح فيد البوليس وهو كيحتج٬ كيرسلوه لبلادو.
اشرف ومحمد وايوب كلهم شاركو فالاحتجاجات المنددة بالاحكام اللي صدرات قبل اسابيع ضد قادة كاطالونيا المطالبين بالانفصال عن العرش الاسباني.
اسبانيا كترحل بزافت المهاجرين غير الشرعيين من بلادها. النسبة لكبيرة منهم مغاربة٬ هادي اول مرة الترحيل مرتباط بالاحتجاج مع الانفصاليين.