حضيو ريوسكم من زيت محروقة مليوحة فشي فيراج خصوصا انه مامعروفش واش هاذشي صدفة ولا من وراه عصابة

تناقلات مجموعة من الصفحات و الحسابات الفيسبوكية صورة لزيت محروقة خواها شي واحد ف فيراج مما جعله يشكل تهديدا لسلامة مستعملي ذاك المقطع الطرقي.
هاذ السلوك الموسخ اللي ما كايحترم لا بيئة لا سائقين، مامعروفاش الظروف اللي تدار فيها، كيف ما معروفش واش ذاكشي كان اهمال و قلة التربية أم انه فعل إجرامي مقصود و من طرف شي شركة ديال الديباناج باش أنه لي جا من هاد الفيراج يتقلب ويطيح التحت باش يجيو هما يجبدوه ويوصلوه فين بغى ب 1000 درهم للفوق، حسب تعبير واحد الصفحة فيسبوكية قالت ان الصورة تم التقاطها جوايه خنيفرة، و هو ما نفته مصادر بالدرك و الداخلية بخنيفرة اللي أكدت ل”كود” ان مصالحها لم تسجل هذا النوع من الحوداث و الوقائع بالإقليم، مشددة على ان الصورة لا علاقة لها بالمنطقة.
و لكن كيف ما كان الحال سواء كانت هاذ الصورة من خنيفرة او غيرها، و سواء كانت بفعل اجرامي أو دارها شي واحد مامسوقش فإنها تظل تعبيرا على طريق الحدورة اللي شادة البلاد بسبب ان تا واحد ما بقى عندو قلب من جيهة البلاد و كلشي ولا تايقول غي راسي يا راسي….