إعفاء الوزاني اول مدير مغربي لريضال بعد زيارة وفد فرنساوي للرباط

علمت كود من مصدر مطلع أن المدير العام لشركة ريضال ادريس الوزاني أعفي صباح اليوم من منصبه.
ووفق مصادر كود فإن الوزاني الذي كان أول مغربي يتولى المنصب بعد ثلاثة مدراء فرنسيين منذ تفويت القطاع للخواص، أعفي مباشرة بعد زيارة وفد فرنساوي جا لبارح لمقر ريضال فالرباط.
الوزاني اللي دوز خمس سنين مدير لريضال مبقاش تالهيه مع الفرنساويين ومع العمال و ربما طيروه قبل ما تنفجر الأمور، خاصة و أن الأمور مع 1600 مستخدم ماشي تالهيه حيث الصغار كيضربو تمارة وشي وحدين فالأطر كيضربو التعويضات بملايين صحيحة.
الوزاني اللي تعفى دخل فصراعات ديال النقابة ومدارش الحياد حيث المنياري البرلماني وعضو لجنة الصداقة المغربية الفرنسية والكاتب العام السابق مكانش تيتردد يكتب للمسؤولين الفرنسوين على أعلى مستوى مباشرة على التجاوزات ديال الوزاني وظروف العمل والتوقيت و ضمان الاستقرار المهني.
زيد عليها الوزاني كان كيلعب على الواجهة وخلا بزاف ديال المشاكل تتراكم.