لبلوكاج فاسبانيا. ما كاينة حكومة والانتخابات غادية تعاود ف10 نونبر

مرة أخرى غادية تكون انتخابات تشريعية فإسبانيا. بعد فشل الاشتراكيين فتشكيل تحالف باش تكون عندهم اغلبية تخليهم يديرو حكومة٬ اعلن زعيمهم بيدرو شانشيز فخطاب للاسبانيين ان الانتخابات التشريعية غادية تدار يوم 10 نونبر المقبل. هادي هي الانتخابات الثانية فظرف 6 اشهر والرابعة فالسنوات الاربع الاخيرة فاسبانيا.
وحسب الصحافة الإسبانية فإن إعلان إعادة الإنتخابات غادي يكون بشكل رسمي ف24 شتنبر. دابا عند سانشيز اجل 6 ايام باش تسالي المدة الرسمية لكن بيان القصر الملكي عقب لقاء الملك فيليبي السادس مع قادة الاحزاب السياسية الممثلة فالبرلمان كان واضح. قال باللي حتي حد ما عندو الامكانية يصاوب اغلبية باش يقود الحكومة.
الوضع السياسي فاسبانيا تغير بزاف. ما بقاوش جوج احزاب كيتحكمو فكلشي. تغيرات اجتماعية مع ازمات ثقة وفضائح فساد فبعض الاحزاب التقليدية خرج احزاب اخرى بحال بوديموس وسيودادانوس وحتى حزب اليمين المتطرف بوكس. هادو كلاو اصوات الحزب الاشتراكي والحزب الشعبي.
استطلاعات الرأي اللي كانت فاسبانيا اخيرا كتعطي للاشتراكيين الرتبة الاولى عاود ثاني وباصوات اكثر من الاصوات اللي كانت عندهم فاخر انتخابات. الاحزاب الاخرى غادية تراجع خصوصا الاحزاب المتطرفة: اليمين المتطرف بوكس واليسار الراديكالي بوديموس.