صبليون كيصوتو اليوم. كيف ما كانت النتائج الرباط من غدا عندها الجديد وخاصها توجد راسها بين اليمين المتطرف واليسار المتطرف: بين داعمي البوليساريو والمطالبين بسور فمليلية

بدات مع التسعود اليوم بتوقيت مدريد عملية التصويت في الانتخابات التشريعية السابقة لاوانها وغير المسبوقة فتاريخ هاد الديموقراطية الفتية فاوربا. اش غادي يخرج من هادوك الصنادق اليوم عندو تأثير مباشر علينا. على المغرب. على سياستو الخارجية على وضعية اكثر من 850 الف مغربي عايش تماك. على التعاون الامني على محاربة الارهاب على كافة مجالات التعاون.
اليوم اللي عندو الحق فالتصويت فهاد البلاد 36.8 مليون ناخب وهي الانتخابات التشريعية رقم 14 من نهار سالات سبانيا مع دكتاتورية فرانكو.
علاش هاد الانتخابات غير مسبوقة. حقاش اسبانيا من الانتخابات 12 وهي تالفة. الحزبان الرئيسيات الحزب الشعبي اليميني والحزب الاشتراكي العمالي ما بقاوش ياخدو الاغلبية. اليميني ماريانو راخوي سير بحكومة اقلية بعد ما تعاودات الانتخابات جوج مرات بلا ما يقدر يحصل على الاغلبية. دار ليه الحزب الاشتراكي قبل عام ملتمس الرقابة وطيحها وطلع بيدرو شانشيز. دوز حتى هو 8 شهورا وما قدرتش يجيب لميزانيتة حكومتو الاغلبية المطلقة ودعا لانتخابات سابقة لاوانها.
دابا كاع استطلاعات الرأي كتعطي للاشتراكيين يكونو اللولين فهاد الانتخابات ولكن بلا ما يفوتو 130 مقعد من اصل 350 مقعد فيما لا يتوقع ان يتجاوز عدد مقاعد حليفه “بوديموس” وهو حزب يساري راديكالي اكثر من 35 مقعد. نفس استطلاعات الرأي تذهب ان لا يتجاوز عدد مقاعد الحزب الشعبي 80 مقعدا فيما يحصل حزب “سيودادانوس” وهو حزب يميني محسوب على الوسط٬ 45 مقعدا مع دخول لاعب جديد لهاد الانتخابات وهو حزب “بوكس” اليميني المتطرف. اذ يتوقع ان يحصل على حوالي 25 مقعدا. هاد الشي كيعني انو لا اليمين لا اليسار وفق استطلاعات راي كثيرة عندو الاغلبية. هاد الاغلبية غادية تكون فيد احزاب قومية فكاتالونيا والباسك وكاناريا.
هاد الاستطلاعات جابت امر جديد هو ان كثر من 40 بالمائة تالفين ما عارفينش على من يصوتو. هادو يقدرو يغيرو كلشي فهاد الاستطلاعات الرأي وفالنتيجة ديال انتخابات اليوم،
المهم وسط هاد الشي المغرب عندو وافد جديد خاصو يتعامل معاه. ايلى كانت حكومة يمينية غادي يقدر يدخل فيها اليمين المتطرف ايلى الحزب الشعبي كان فحاجة لاصواتو وغالبا هاد الشي للي غادي يوقع. حزب دعا فحملتو باش يتبنى سور فسبتة ومليلية باش تحمى حدود اسبانيا من المهاجرين. يعني حزب باغي ينوضها مع المغرب فقضية الهجرة اللي عزيزة على ناخبيه وبيها غادي يدخل لاول مرة فتاريخ الديموقراطية فاسبانيا الى البرلمان.
وايلى دار الحزب الاشتراكي العمالي الحكومة غادي يحتاج ل”بوديموس” هاد الحزب اليساري الراديكالي عندو موقف واضح من الصحرا. كيدعم البوليساريو دعم كبير بزاف.
دابا المغرب بين نارين تقريبا. فمعادلة صعيبة. واخا الرباط غادية تفضل حكومة يمينية اكثر من يسارية. يبعدو غير على الصحرا وكلشي يسهال.