مصدر من “ميدي 1 راديو ” ل”كود”: البوسط غير خطأ وحشوما يسميونا صهاينة ويخاطرو بحياة الصحفيين اللي خدامين فالراديو

ميدي 1 راديو ردات على البوسط اللي بارطاجا الناطق الرسمي باسم الجيش الاسراءيلي، افيخاي ادرعي، وكتب فيه كتعليق: شهد شاهد من أهلها، وكيقصد ميدي 1 راديو، حيت فالبوسط الاصلي ديال "ميدي 1 راديو"، وصفات فيه الراديو قتل الاسرائيلي ب”الهجوم الارهابي” بالضفة الغربية المحتلة.
ومصدر من القناة اكد ل”كود” ان البوسط غير خطأ “عدم انتباه” دارتو صحفية مبتدئة.
واضاف نفس المصدر ل”كود” ان الصحفية حيدات البوسط من بعد دقيقتين فقط، ولكن كان خداو “سكرينشوتس” ديالو، وسركل فالانترنيت.
وتأسف ذات المصدر، لركوب بعض الصحف على هاد ال”حادث” باش يتاهمو الراديو ب”الصهيونية”، ويخاطرو بحياة الصحفيين اللي خدامين في “ميدي 1 راديو” اللي وصلهم اليوم السبان والتهديدات.