أرخص المحروقات في المغرب البارح واليوم هي في محطات “أفريقيا”

حسب ما عاينت “كود” بزاف ديال الناس مشاو دارو ليصانس من محطات افريقيا ديال أخنوش لي البارح كان ثمن المحروقات فيها 8.73 درهم للتر، مقابل 9.50 درهم عند طوطال، و9.38 عند وينكسو، و9.37 عند أويليبيا، وفيفو لي وصل 9.49 درهم للتر.
فسوق المحروقات كل واحد داير ما باغي، وحتى شي تقنين ما كاين، واخة الوزير قالك غادي يعاقب الشركات لي منقصاتش بين 30 و40 سنتيم في اللتر الواحد.
وفي عز هاد الروينة ديال كل واحد وشنو كيدير، تطبيق ديال “محطتي” لي زعما معولين عليه الناس يوريهم لائحة الأثمنة ديال السطاسيونات لي حطاهم، طاح ليه السيرفور حيت كثر عليه البشر.
ها الشعب ديما خاصو يعورها من شي جهة. وا سي الوزير، وا المسؤولين ديرو شي زفتة مقادة فهاد البلاد!