خاص. لمغاربة حطمو رقم قياسي فالماتشات اللولين فالمونديال وها فاش وبالارقام

لمغاربة حضرو بزاف للمونديال. بزاف بزاف للماتش الثاني بين الاسود والبرتغال بلوجنيكي بموسكو. اكثر من الماتش الاول ضد ايران فسان بيترسبورگ. هادي كلشي شافها٬ غير اللي تأكد وفق مصدر رسمي ل”كود” ان الجمهور المغربي بعد اجراء كل منتخب مشارك فالمونديال لجوج ماتشات٬ كان الاكثر عددا من بين جماهير 31 دولة اي كاع الدول المشاركة باستثناء روسيا البلد المنظم.
وفق مصدر “كود” فان الماتش الاول يوم 15 يونيو ضد ايران حضرات قرابة 40 الف متفرج٬ فالماتش الثاني كان العدد اكثر. رسميا وحسب مصدر “كود” فان عدد المغاربة اللي شراو التذاكر وجاو من المغرب 19 الف مغربي وشي مائة ولا مائتين فيما بلغ عدد المغاربة المقيمين باوربا اللي جاو يشوفو الماتش 30 الف.
دابا حتى شي فرقة فالمونديال ما جابت هاد الجمهور واخا كاينين دول قراب وكاينين دول عند شعبها امكانيات كثيرة.
وفق مصدر “كود” واخا هاد العدد لكبير ما وقعوش مشاكل كبيرة. شي 25 واحد كانو اغبياء بزاف وبغاو يحرگو من دولة بحال روسيا لدولة بحال فيلندا. بجوجهم ماشي مزيرين وسادين كلشي. بالاضافة الى مشاكل عادية بحال اللي تقطع بيه لحبل ولا مشى ليه الباسبور “هادوك حالات قليلة ماشي كثيرة المهم ان الروس بريوسهم شكرو هاد الجمهور” يحكي مصدر مغربي ل”كود” من موسكو.