شنو كتسناو من شعب تيخاف يكب الما سخون فالقرقارة

واحد المسطي، و لا غير طانز، فاق واحد النهار و ڭال للناس ديال الدوار للي ساكن فيه بللي حلم بشي ولي صالح ڭال ليه جمع بنادم و ڭول ليهم يهزو العلام نهار 26 فرمضان و شعلو العافية فالبلاصة الفلان فلانية راه غادا تشق الأرض و يخرج منها الكنز. و حيث هاد الناس فاقدين الأمل و ضارباهم الحزقة حتى النخاع، ثاقو بيه و علمو الدواوير المجاورة حتى صدقو عشرات الآلاف تابعين هبالو و خارجين من خيماتهم تحت الشمش واخا رمضان و كيتسناو من نيتهم يخرجهم من الفقر بكيلوات الذهب و الديامونض. الصراحة كون ما شفتش التصاور كان يصحاب لي غير مطلعينها فالفيسبوك حيث قاسحة شوية تعرف بللي المغاربة مزالين تيتيقو بهاد الخزعبلات في الوقت للي ميريكان ما بقى ليها والو و تستعمر كوكب المريخ.
و لكن ما عندناش علاش يجينا هاد الشي غريب. راه فالمدرسة قراونا بتخراج العينين بللي سيدنا سليمان كان تيهدر مع النمل و العصافير على أساس أنها حقيقة مطلقة لا تخضع إلى النقاش، كي بغيتي هاد الشعب يخرج؟ بطبيعة الحال غادي يخاف يشوف فالمرايا بزاف و يكب الما طايب فالقرقارة، حيث من غير أنه تيآمن فعلا بوجود الجنون، تيصحاب ليه تيكرهو ريوسهم لدرجة غادي يخليو القنات النقيين كاملين و يتركنو غير فالكوابن و القرقارات. بطبيعة الحال العانسات غادي يفسرو العكس للي عندهم بشي سحور دايرينو المنافسات ديالهم و للي مايتحايدش إلا إذا طلاو حالتهم بالحنة و عامو فمريزيڭة. بطبيعة الحال غادي يتعاملو مع الأمراض العصبي على أساس أنها لمس من الجن و كتعالج بالرقية الشرعية. راه مازالين قرى كاملة الاقتصاد ديالها قائم على تشوافيت و السحور، و غير سنين هادي كان مازال بويا عمار محلول تيتكتفو بيه بالسناسل الدراري الصغار للي مراض بالتوحد. هاد الشي ما مقتاصرش على الفقراء، راه كيآمنو بيه حتى الأغنياء، غير هو المرفحين عوض ما يمشيو لسيدي عبد الرحمان، تيشدو الطيارة لداكار ولا واڭادوڭو حيث معروفة على السحارة الأفارقة بأنهم حارين.
دوك القصص ديال الزوهريين للي كيتخطفو و كيدبحو باش يتعطى الدم ديالهم هدية للجنون مقابل الكنز، كانو تيتصحابو ليا غير أساطير تيعودوهم الكبار للصغار باش يخلعوهوم من الغرباء و يحميوهم من المغتصبين. حتى الواحد النهار تبعني واحد الفقيه حتى لباب الثانوية و بغى يعطيني نمرتو حيث شافني حولة شوية و اقتارح عليا نتلاقا بيه و نعطيه، على حساب ما ڭال، غير شيييييييي شوية ديال الدم. تما عرفت أن هاد الغباء ماشي غير كيضحك و لكن يقدر حتى يقتل.