تفاصيل حصرية وخطيرة على حريق ميناء أكادير الي كان غايتسبب فكارثة (فيديو)

فتفاصيل جديدة بموضوع الحريق لي عرف ميناء الصيد بأكادير وتحرقو فيه ثلاثة ديال البواخر، فقد أفاد مصدر عليم ل”كود”، بمعلومات حصرية لداكشي لي وقع فالميناء .
بحيت قال أن البواخر المعنية هي بواخر صيد كتحمل العلم المغربي ومملوكة لشركة مغربية خاضعة للقانون المغربي وماشي صينية، والحريق إندلع فباخرة مملوكة ل”محمد الزبدي” حسب ما قال شخص فالفيديو، و إندلع نتيجة أعمال التلحيم، وإنتقل لبواخر أخرى بسرعة رهيبة بفعل الما العامر بالزيت ديال “الفيدانج” لي كيخويو ل”باركوات” مباشرة فالشاريج ديال الميناء، بتساهل وعدم إهتمام خطير لقبطانية الميناء بهادشي.
وأضاف أن عملية إطفاء النيران كانت بفضل يقضة وشجاعة العمال، الي إستعملو طفايات الحريق الموجودة لهذا الغرض بعين المكان، الشيء الذي كيأكد إحترام ملاك البواخر وأوراش صيانتها لضرورة التوفر على وسائل الحماية الضرورية، والخطير فالأمر أن أعوان القبطانية والوقاية المدنية تأخرو بزاف فقدومهم لمكان الحريق، والفضيحة كونهم قراب بزاف من مكان الحادث.
حريق خطير شد فباخرات صيد فميناء أكادير
Publiée par GOUD sur vendredi 1 juin 2018