سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
فيهم ملايرية والضريبة هي اللخرة ماكايخلصوهاش وتالاخلصوها كايديكلاريو غير لي بغاو و شي لاخر كاينعسو عليه و يجيو يهضرو ليا انا على الوطن و يتزايدو معايا على الوطنية ديالي انا لي كانعطي كل شهر من الصالير ديالي اكثر من الثلت للوطن !
من الحوايج لي كايخليو الواحد يزيد لقدام فحياتو هي يتقبل النقد و يسمع للمنتقدين و يحاول يحسن من راسو لابانو ليه شي ديفوات. هادي قاعدة عامة و معروفة و لكن واخا هكاك صعيبة و ماشي كلشي كايعرف ليها ! عرفتي باش تتقبل النقد راه خاصك يكون عندك مستوى النضج كبير و تكون قادر تتعامل بحياد مع راسك، و تقول لراسك مرة مرة آ رويسي راك كاتخور ! هاد القضية باينة ماعندش سي الناصيري ! لي خرج لينا بواحد التصريح كايقول فيه بلي لي نتاقد ” الملحمة” ديالو خائن للوطن و ماشي وطني و أكيد مدسوس من جهات معينة ( أعداء الوحدة الترابية) و ليزيكسطراطيريسطر ؟ ياك آ الناصيري ! باش تكون فنان و لا تتقبل النقد راه طامة كبيرة، حيت الفنان معرض للنقد دييييما و ماشي بالضرورة من طرف النقاد السينيمائيين و صافي ! راه اي واحد يقدر يعطي رأيوو فعمل فني و ينتاقد عمل فني كيما بغا يكون حيت فالاساس الفن يتوجه للناس كاملين بدون استثناء. أنا شخصيا من الناس لي ماعجباتهمش الملحمة و كتبت عليها ! ماعجباتنيش آ عيباد الله ! و جاتني كاتشبه لدوك الفيديوات ديال البروباگاندا الستالينية و كاتصورنا فحالا عايشين فكوريا الشمالية ماشي فالمغرب ! و عكس داكشي لي كايتخايل السيد لي صايب هاد الملحمة راه اقحام اسم الملك و تصويرتو ماشي ضروري اليوم فالاعمال الفنية خصوصا الرديئة منها لي باكلي و مصايبة بطريقة كور و عطي للعور و ماشي بهاد الطريقة غاتبينو ليه راه كاتبغيوه و راكم خدامين ! حيت خدمتكم هي الابداع ماشي التخوار. الناصيري قال واحد الجملة فالتصريح ديالو قالك ” خاص غير يسمعو وطن و ملك و يسكتو” ! ياك آ حنيني ؟ هادشي راه سميتو الشطط ! و معنيتو لي جا اليوم و لا غدا و خور شي حاجة و دار فيها سميت الملك ماينوضوش الناس ينتاقدوه ! نفس العقلية لي عند هاداك لي باني براكة عشوائية و فاش كايجيو يهدموها ليه كايغوت عاشااا الملك و كايعلق تصويرة الملك و الراية فوق البراكة باش كايقرب ليها حد ! و نفس العقلية لي عند الخضار لي محتل الشارع العام و فاش كاتجي السلطة تحيدو كايبدا يغوت واك واك عاش الملك ! عاش الملك !ايوا دابا واش غانزيدو على هادو حتى الفنانة لي دابا قالك ماخاصش ننتاقدوهم حيت دارو عمل فيه اسم الملك ؟ واش اسم الملك و صورة الملك ولات فزاعة باغين تخلعونا بيها ؟ تخبيو وراها فشلكم ؟ هادشي ماشي معقول ! لي خاص يفهم الناصيري و من جاوره ! انه الانتقاد وارد ! و ديما غايكون ! يكون عمل فني ” عادي” و لا عمل فني ” وطني” ! الرداءة كاتبقا رداءة و من حق اي واحد يعبر على رأيو فيها و يحاربها ! راه طبنا بالرداءة ! عينا ! تقهرنا ! گاع الدول لي حدانا كاتزيد للقدام و حنا حارنين. و ديك الهضرة ديال المنتقدين خونة و بوليزايريو و جزائر ( كيما قال الناصيري) باراكا من استحمار الناس بيها راه عيقتو ! تحملو مسؤوليتكم شوية و لي خرا شي خرية يقد بيها بلاصة ماتبغيو تلصقوها صحة فديك الشماعة لي كاتعلقو عليها خيباتكم و فشلكم و لي كاتسميوها ” اعداء الوطن”. راه اعداء الوطن الحقيقيون ! هوما الفنانة لي كايضربو فلوس الدعم فجيبهم كايديرو بيهم الفيرمات و الطونوبيلات و الفيلات و كايخسرو جوج دريال فالعمل ! تاكايخرج عوج فحالا مقيوم بسطاشرميا ! اعداء الوطن الحقيقيون هوما دوك ” الفنانة” لي كايتخلصو كاش فالعراسات و القصارات و الكاباريات ! و ماكايخلصوش الضرائب للدولة و كلشي عندهم فالنوار ! و ماعندك منين تشدهم ! فيهم بزاف ملايرية و ملاينية و الضريبة هي اللخرة ماكايخلصوهاش و تالاخلصوها كايديكلاريو غير لي بغاو و شي لاخر كاينعسو عليه و يجيو يهضرو ليا انا على الوطن و يتزايدو معايا على الوطنية ديالي انا لي كانعطي كل شهر من الصالير ديالي اكثر من الثلت للوطن ! اعداء الوطن هوما لي كايركبو على الابداع و الفن باش يغمسو فالگاميلة ديال شي قناة و فاش كايسالي وقتهم كايتسوخرو للتيساع و كايبداو يشيرو عليها بالحجر ! ملي كايكونو كايغمسو فالگاميلة كاتكون القناة زوينة و التلفزة الله يعمرها دار و مدير المركز السينيمائي ولد الناس و غير كاتسالي نوبتهم كايبداو يسبو و يطالبو بإعادة البزولة فحال شي دري مفطوم. كبرو شوية ! الفين و تمنطاش هادي و ديك الهضرة ديال اعداء الوطن مابقاتش كاتوكل طرف د الخبز. و الوطنية افعال و ممارسات كاتكون كل نهار ماشي غير اقوال و اغاني.
