سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
كانفهم بلي هاد المقاطعة فحال شي دمالة عامرة بالقيح ديال الحگرة والزلط والحقد الطبقي على صحاب الفلوس وتفرگعات لينا على وجهنا، ولكن فنفس الوقت عرات على ديك النغزة ديال الديكتاتورية لي فكل واحد فينا
فاش كتبت قبل على المقاطعة هضرت على واحد النقطة ديال الديكتارورية “المقاطعين” لي باغين يفرضو عليك شنو تشري و شنو ماتشريش بزز ! بالحق ماهضرتش عليها بالشكل الكافي، لي غايخليني نرجع ليها اليوم هوما مجموعة ديال المواقف تعرضت ليهم فهاد اليوماين اللخرة. الموقف الأول حضرت ليه فاش مشيت نتقدا فواحد السوق من الأسواق الكبرى ، و شفت انه الناس كانت كادوز من حدا البلاصة لي محطوط فيها سانطرال و سيدي علي باش تشوف واش كايتباعو و لا لا ؟ و الطامة الكبرى انه لي كايهز شي قرعة ديال سيدي علي و لا كاياخد كارطونة ديال سنطرال كايخصو يتحمل النظرات ديال الناس لي كايشوفو فيه فحالا قاتل بوحمارة ! ” علاش خديتي سونطرال ؟” ” واش مامقاطعش؟ ” ” واش ماكاينة مقاطعة ! ؟ ” … و حتى لي ماكايهضرش كاتشوف فالشوفات ديالو بلي ماحاملكش تشري الماركات لي هوا مقاطعها و كايشوف فيك فحالا كاترتاكب شي خيانة عظمى. الموقف الثاني تعرضات ليه واحد السيدة من العائلة مشات تشري سانطرال و فاش طلباتو لمول الحانوت، سولها واش مامقاطعاش سانطرال ؟ راه كلشي مقاطعو ! و بواحد النوع من التحايل حاول يدفعها تاخد حليب من ماركة اخرى من غير سانطرال. الموقف الثالت عاودات ليا عليه الكوافورة هاد الاحد ! قالت ليا بلي سيفطات ولدها يجيب ليها الحليب سانطرال و مول الحانوت عطاه جودة و قاليه “سير هادشي لي عندي” ثلاتة ديال المواقف كايبينو نوع جديد من الديكتاتورية كايمارسوه المقاطعين على المستهلكين ! يعني دابا لابغيتي تقدا ماحليتك للديكتاتورية ديال مالين الحوانت لي ولاو باغين يفرضو عليك تشري ماركات عوض اخرى بزز منك ! ماحليتك للناس لي تاهوما كايحاولو يفرضو عليك ماتشريش الماركات لي هوما مقاطعينها، يا ايما بالضغط، يا ايما بالابتزاز العاطفي ” واش مامقاطعش ؟ ” ” واش مازال كاتشري سانطرال ؟” ” واش مازال كاتشري سيدي علي” …” و هاد الجمل كاتسمعها فالحومة و فالادارة و فالخدمة و فالزنقة . هادشي كايخلي تلقائيا بزاف ديال الناس مگدمة فهاد المقاطعة بزز منها و غير باش ماتخرجش من ” الجماعة” حيت لي كايخرج من الجماعة هوا الشيطان فالثقافة ديالنا ! و الخطير فهادشي، هوما الفيديوات لي نتاشرات فوسائل التواصل الاجتماعي و لي كاتبين مجموعات ديال الاشخاص كايهددو مالين الحوانت لي عندهم الماركات المقاطعة ( بفتح الطاء) ، و الشيافر ديال الكاميونات و الناس لي خدامين فسطاسيونات افريقيا و شي مرات كايفوتو التهديد و كايوليو يسبوهم و يحيدو ليهم المنتوجات صحة من يديهم بواحد الهمجية ما بعدها همجية ! واش سوق دينمك فشنو كايشريو الناس و شنو كايتقداو ؟ طبعا لا ! واش الناس مامنحقهاش تشري شنو بغات ؟ طبعا من حقها اذن علاش هاد الوصاية الجديدة لي شي باغي يفرضها على شي بزز؟ باشمن حق؟ راه فاش كاتبدا تمارس الديكتاتورية ديالك على الناس و فاش كايوليو مجموعات كايهددو مالين الحوانت و الناس لي خدامين فالشركات صافي مابقيتيش محسوب مع صحاب ” المقاطعة وسيلة احتجاج سلمية” و وليتي محسوب مع البلطجية و الارهابيين. انا كانفهم بلي هاد المقاطعة عطات فرصة لبزاف ديال الناس يحسو براسهم عندهم ثقل، عندهم قوة و صوت مسموع هوما لي عاشو حياتهم كاملة عيشة الذبانة فالبطانة، كانفهم بلي هاد المقاطعة فغياب انجازات تاريخية وطنية يحتافل بيها الشعب و يحس براسو مشاركها مع بعضياتو كاتلعب دور ” الانجاز” فحال شي ماتش ديال الكورة ! و كانفهم بلي هاد المقاطعة فحال شي دمالة عامرة بالقيح ديال الحگرة و الزلط و الحقد الطبقي على صحاب الفلوس و تفرگعات لينا على وجهنا، و لكن فنفس الوقت عرات على ديك النغزة ديال الديكتاتورية لي فكل واحد فينا ! و بينات بلي بزاف ديال المغاربة مازال عندهم مشكل مع ” الشخص” مع ” الفرد” مع الاختيارات الشخصية و ماكايفهمووووووش بلي ماحناش قطيع باش نعيشو بنفس الشكل و يكونو عندنا نفس المواقف و ناكلو نفس الماكلة و نتبناو نفس القضايا ! حتى من الكومونطيرات ديالهم حول المقاطعة اغلبهم كوبي كولي ! نفس المنشورات كاتعاود ! نفس الهضرة ! و شكون فيكم ماشافش هاد التعليق : نحن الآن منشغلون ……بالمقاطعة…. سنجيبكم حالما نكون شاغرين….. شكراً لنا….و تباً لكم. أين أنتم من الشعب ؟ الاخوان كلشي يدير copie coller لمقاطعون خليه اريب حليب سنطرال ????❌ الماء علي بلا سيدي ????❌ افريقيا أخنوش ⛽️❌ الا ماشريتيهش ماغديش تموت كلو الشعب متحد بل صحافتكم من تسعى للتشويش علينا و شكون فيكم ماقراش قصة داك السيد لي عندو باك بليس 12 لي كايعاود بلي الشركات تحملات خسائر خيالية و يلي خايفين ينقصو و يضسر عليهم الشعب و كايديرو الاجتماعات السرية ؟ نفس التعاليق ! نفس الكومونطيرات ! و الديكتاتورية ملفوق ! فحالا باش تعيش معاهم خاصك بزز منك تولي فحالهم . زيرو ” فردانية” !
