ها جديد الجثة الي لقاوها بلا راس وأطراف ف”العين السخونة” نواحي أكادير

علمات “كود” من مصادر مطلعة، أن الفرقة القضائية التابعة لسرية درك أكادير، تمكنات من إعتقال واحد من المشتبه فيهم فجريمة القتل البشعة لي وقعات قبل 20 يوم ، ولي خلقات إستنفار كبير فصفوف الأجهزة الأمنية، بعد انتشار صور للجثة فتطبيق “واتساب” .
وكانو الجناة قطعو للجثة راسها وأطراف الجسد، قبل ما يلوحوها فأحد الأودية بالمنطقة الجبلية “العين السخونة” ضواحي مدينة أكادير.
وكشفات المصادر، أن التحليلات المخبرية الي تدارت على الجثة، مكنات من تحديد هوية الضحية، وهو شخص ثلاثيني كينحادر من الجنوب.
ورجحت مصادر مطلعة أن الهدف من تشويه الجثة ، كان هو محاولة الجناة يضللو المحققين ويطمسو معالم الجريمة ، قبل ما يتم كشف هاذ اللغز وطارو على واحد من المشتبه فيهم ، وباقي كيحققو معاه ، باش يوصلو للشركاء ديالو من المتورطين فهاد الجريمة البشعة بزاف.