طاحت روح أخرى فطنجة ف24 ساعة.. وها أش وقع

مزال مسلسل النزاع الي كيسالي بالموت مستمر فطنجة، وهاذ المرة ف”حي الوردة” الشعبي لي غيولي ثالث حادث دموي من هاد النوع خلال أسبوعين.
قالت مصادر عاينات الحادث أن شجار عرفو حي “الوردة” فمقاطعة بني مكادة فالساعات الأولى من صباح اليوم الأربعاء بين جوج ديال الناس، تطور لمطايفة خايبة بزاف وسالات بجريمة قتل مات فيها أحد الطرفين، بحيت تلقى الضحية طعنة قاتلة بالصدر جهة القلب بواسطة سكين كبير الحجم وطاح كلو دمايات، وحاولو ينقذوه بحيت تم نقلو لقسم المستعجلات التابع للمستشفى الجهوي محمد الخامس بطنجة لكنو لفظ أخر أنفاسو قبل مايوصل للمستشفى.
مصالح الأمن بولاية أمن طنجة فتحات تحقيق فالحادث، وعرفات هوية الجاني الي هرب لوجهة غير معلومة بعدما إرتاكب الجريمة الشنيعة.
وهادي تاني جريمة فغضون 24 ساعة الي غادي طيح فيها روح بهاد الشكل، حيت كان نزاع مماثل لبارح فحي “بئر الشيفا” تلقى فيه الهالك حتى هو طعنة على مستوى الظهر ولفظ أنفاسو .