واخيرا وصل ادريس لشكر لمرادو وحرم الحكومة على كلشي. الخاسر فيها اخنوش حقاش دار راسو ف"حرايفية السياسة" وهو بوحدو من القادة الاربع اللي عندو عذرية سياسية وشعبية وعلاقة مع بنكيران

اللي البارح كان ناشط وفرحان بكل ما وقع فالحكومة وخلى عبد الاله بنكيران يوقف كل مفاوضات مع عزيز اخنوش رئيس التجمع الوطني للاحرار ومحاند العنصر الامين العام لحزب الحركة الشعبية٬ هو ادريس لشكر الكاتب الاول لحزب الاتحاد الاشتراكي. هاد الشخصية عندها قدرة عجيبة على يقسم كلشي. قسم حزبو قسم اتباعو ودابا صدق كلامو اللي كان تنقل من قبل صحف باللي ما غادياش تشكل الحكومة وغادية تفشل كلها ايلى تخليتو علي وعلى حزبي وما تعطيونيش مقابل على عدم تشكيل الحكومة من الاول.
لكن في المقابل اللي خسر فهاد البيعة والشرية وكان ضحية "حرايفية السياسة" هو عزيز اخنوش رئيس التجمع الوطني للاحرار. بغض النظر على كيفاش وصل وهامش تحركو هو الوحيد من بين الزعماء الاربعة =شوية محمد ساجيد ديال الاتحاد الدستوري= اللي عندو عذرية سياسية. عندو شعبية ظهرها استطلاعات رأي دارت على الشخصيات السياسية. ممكن يتحرك يدافع على مصالح حزبو ومصالح حلفاؤو بلا ما يدير القطيعة مع بنكيران. فهاد البيان كان اخنوش يفاوض بنكيران اولا وحتى تسد المفاوضات يخرج بيان حزبو بوحدو. حقاش عارف باللي بيان رباعي عندو معنى سياسي واحد. قادرين نديرو حكومة بلا بيك يا رئيس الحكومة المعين