الامريكيين باغيين يجيبو لمجرد. المدعي العام بنيويورك كيكول بان طلب تسليمه من فرنسا "قيد الدرس" ومحامي البنت اللي اتهمتو باغتصابها "السيدة طوات الصفحة" وهاد الشي ما كيمنعش تشهد ضدو فالمحكمة

واخا سعد لمجرد عطى فلوس كثيرة للبنت اللي كانت اتهمتو باغتصابها فنيويورك وهرب من ميريكان للمغرب مازال القضية لاصقة فيه. الجريدة الامريكية الشهيرة "نيويورك تايمز" دارت مقال عليه وقالت باللي المدعي العام بنيويورك طلب من السلطات الفرنسية ترحيلو باش يتحاكم وان هاد الطلب "قيد الدرس".
دابا هاد القضية كان كيعتاقد لمجرد انها سالات باش تفاهم مع الضحية. محاميها قال ل"نيويورك تايمز" باللي موكلته "طوات الصفحة" وباغية تعيش حياتها ولكن هاد الشي ما كيمنعش القضاء باش يعيط عليها تشهد ضدو.
دابا لمجرد خاصو يفك حريرتو فباريس مع القضاء الفرنسي ايلى ما فكهاش غادي يمشي فيها. راه فالحبس من 26 اكتوبر ويقدر يبقى مدة طويلة بزاف بزاف