كيفاش ولينا فهاد الوضع الهستيري اللي فيه جمعية محبي تامر حسني و الدريات كينقزو باش يعنقو سعد المجرد وأخيرا عتقووو إيهاب را مسكين غيقتلوه

—
كنا شحال هادي يامات الوولكمان قبل مايبان النيميريك أقصى ما يمكن ليك تصنت ليه هو البركاني وسمر وحسني والشاب مامي ومحمد راي ورزقي وحفيظ لفتواكي صاحب اغنية رواح اصاحبي نطلعو لجبالة ….هاد الاخير كان بمثابة هو امير ايهاب ديال ديك الساعة ..بحيث كان كيتمتع بواحد التبوكيصة جذابة الى حد ما وفقا لمعايير ديال التسعينات
الفترة لي كان فيها الكاسيط والوولكمان هو ستاار أكاديمي ديال جيل التسعينات والتمانينات .. ومن خلالهم كنا كنتبعو اخبار اخر النجوم …وبالإضافة لأنه كانت واحد الظاهرة زوينة كتمثل فشي بوفري غالبا يلاه كتلقاه يا اما خارج من شي ستة شهور ديال الحبس باقي خضر او يلاه تفرق مع جميعة بنت لمعطي لي كان مزعوط فيها ….و ضارب شي رابعة ماحية وهاز شي سجالة كبيرة فوق كتفو لي هي اقدس ممتلكاته… وطالق حسني على حر جهدو وغادي في الدرب وكلشي العالم مزك معه بداك الدويسك ديال سمحلي يا زركة
وفي حالة ما كنتي باغي تعرف واش طلق حسني او خالد شي دويسك ما عليك سوى بالحلاق ديال لحومة لانو من بين سابع لمستحيلات تلقى شي حلاق ديك الساعة ماكيتمزكش لحسني …وزيد عليهم الشيافر بشتى تلاوينهم ….ماكان ديك الساعات لا شرقي ولا عبو الريح اغاني الراي كانت هي لي طاغية بشكل كبير على الصعيد الوطني وكان للناس فهاد الفن فيما يعشقون مذاهب …وكل مغني لديه واحد الامبراطورية ديال لي فانز ,,,ها لي كتلقاه كيميل لمحمد راي وكيجيه رزقي وداكشي ديال سامحيني حنا حامض ومطيح النيفو ها لي كتلقاه من عشاق الشاب عقيل,, وقلع اخاي الحوساين …ها لي كتلقاه شاد الريزو ديال الزهوانية لي كانت بمثابة ابتسام تسكت ديال ديك الساعات الخ الخ
المهم هادشي طفا تقريبا في بداية الالفين …. وإنتقلنا لهاد الوضع الهستيري او ولينا كنشوفو في المغرب جمعية لمحبي تامر حسني ومشهد ديال الدريات كينقزو ويجريو باش يعنقو سعد المجرد …. وأخيرا فضيحة عتقووو إيهاب را مسكين غيقتلوه ..وفي الغالب الأعم هاد محدودي الذكاء لي كتلقاهم مهووسين بهاد الموجة ديال العبط الشرقي هما نتاج ديال إنعدام داك الطابع ديال لحروشية لي كانو كيتميزو به جيل التسعينات وما قبلها,,, وهادشي هو لي خرج على الذوق العام ديال عباد الله او وتزادت بزاف لحالة كما قالت زينة الداودية ,,,,ثم زيد عليه هادشي نزعة التكلمين ايلا تبناوها بوزبال را هي لي خلات عاود هاد لحزاق لي ولينا كنشوفو فيه كيزيد ويتفاقم في المجتمع المغربي ومانساوش عاود بلا كيفما نفعو ناس فناس خرين بحالي التيليفيزو ولي غيزو سوسيو عامل اساسي كينضاف للعوامل لي زادو خرجو علينا وبزاااف ,,, حيت في الاصل هاد لماسايل مادارشت لينا
وهادشي صراحة ولا كيندى ليه الجبين ,, حيتاش را من غير المعقول بتااتا وشي يؤشر على كون العالم بالفعل ليس بخير مني نوليو نشوفو بحال امير ايهاب لي غا من ملامح فيكورتو ربما يقدر شي حد يستاعن به ويقدمو للعولاما لنسف كذبة إنقراض كائن النياندرتال ولاو كيتجاراو عليه باش يصوروه فقط لانه دااز فبرنامج ستار أكاديمي ..
والعجيب والغريب والمريب انه من مدينة أسفي التي اكن لها فائق حبي واحترامي وتقديري كجميع المغاربة على ود الخير لي قدمتو للبشرية المتمثل في فن العيطة والشعبي…والسردين وعمالقة الوترة الأقحاح المحفوظي وعابدين ,,,,…لحاصول وكما قال عوتاني الشاعير لقد هزلت حتى بدا من هزالها كلاها وحتى سامها كل مفلس