المؤتمر الوطني الثامن عشر لحزب الاستقلال للي بدا عشية الجمعة فبوزنيقة، كيعيش على وقع "الهدوء اللي كيسبق العاصفة"، بحيث لا يزال الخلاف كبير بين جوج تيارات، تيار حمدي ولد الرشيد للي حاكم لازون ولكروا فالحزب وتيار فاس للي كيعيش على تركة وبلطجية شباط وشويا من الكفاءات للي جايات من عائلة علال الفاسي والديوري. اليوم كاين خلاف كبير على شكون يترأس المؤتمر، تيار ولد الرشيد دافع بفؤاد القادري، للترشح لهاد المنصب، مقابل ترشح عبد الصمد قيوح المدعوم من تيار فاسة. غير هو هاد جوج مصالحينش حسب مصادر استقلالية ل"كود"، اولا هادو معروفين ب"اللهطة" على المناصب، شفنا كيفاش قيوح دار حروب باش يدخل لمكتب مجلس النواب، ونفس الشيء لفؤاد القادري مول الفضايح فجهة كازا سطات. مصادر استقلالية قالت ل"كود" هذا امتحان لحمدي ولد الرشيد لأنه هو اللي حاكم لازون ولكروا ديال المؤتمر، خصو يدفع بوجه معروف ونقي وقادر يخلق التوافقات ماشي جوج كلهم مشاكل فالجهات ديالهم، قيوح عندو مشاكل مع برلمانيي سوس حيث ديما كيخوي بهم، والقادري ومن لا يعرفه صاحب اللغة الشعرية والوعود الزائفة". يلا مقدروش الاستقلاليين يفكو هاد الحريرة ديال رئاسة لجنة المؤتمر ولاليست ديال اللجنة التنفيذية، ممكن المؤتمر يتحول الى حرب طباسل وكراسي وكل الاشياء القابلة للحمل والكسر. الاجواء مشحونة داخل المؤتمر، كيف عاينت "كود"، كاينين مجموعات لشباب باينين جايين غير للمهام الصعبة ديال المدابزا والبونيا وتبادل اللكمات. هادشي كولشي شافو اليوم.
