اليعقوبي ماعقلش عليهم.. شي بيران مفرعنين دارو راسهم فوق القانون سدو ليهم ومنهم" بالاثينو" اللي ديما نايضا فيه المدابزا

اللي محترمش التباعد فالبيران سواء ديال المفرحين او ديال الطبقة المتوسطة، مصيرو الاغلاق. حسب معطيات "گود" دارت حملة كبيرة فالرباط خلال الأيام الأخيرة بتوجيهات صارمة من الوالي محمد اليعقوبي، باش كولشي يحترم الاجراءات الاحترازية.
عدد لا يستهان به من المطاعم الفاخرة تسدات، وتخداو فيها اجراءات صارمة، بحيث مور اغلاق مطعم لي دوبالي، تغلقو بيران فحي المحيط، وبار ديما فيه الصداع والمشاكل اللي كاين شارع علال بنعبد الله، القريب من البرلمان.
مصادر "گود" اوضحت بلي اغلاق بار بالاثينو ثلاثة ايام اللي فشارع علال بنعبد الله، كان مور ما جات لجنة مراقبة رسلها الوالي اليعقوبي شخصيا للوقوف على احترام الاجراءات، خصوصا فحال هاد البار "بالاثينو" اللي مسيرو شي واحد كيدعي انه واصل وعندو علاقات مع مسؤولين اللي يقدرو يحميوه واخا يوقع للي بغا يوقع فهاد البار، دبا جابها فراسو بهاد الزعامة الخاوية.
وسبق ل"گود" نشرات صور من داخل البار فيها فيه الرقص والديسكو ايامات الزيار، وعادي وممسوقينش للتباعد بل كاين شطيح والعناق، طبعا كاين بعض المسؤولين في السلطات فالرباط مداروش خدمتهم، ولكن اليعقوبي كيتوصل ديما بالتقارير وكيتابع الصحافة وكيتفاعل بجدية مع اي شكاوى او ملاحظات تخص تدبير عدد من المرافق. وهادشي لي دار مع هادو.