ميسي موحال يلعب ضد المغرب: مشاركة أسطورة الأرجنتين فأولمبياد باريس فيها الشك

كشفت تقارير إعلامية دولية، أن أسطورة الأرجنتين ما غاديش يشارك مع منتخب بلادو فدورة الألعاب الأولمبية باريس 2024، وهي المسابقة اللي طاح فيها منتخب الأرجنتين مع المنتخب الوطني المغربي فالگروب الثاني مع ثالث آسيا ومنتخب أوكرانيا.
وكشف الصحافي الأرجنتيني مارتن أريفيلو اللي خدام مع ESPN، أن أسطورة الأرجنتين ليونيل ميسي ما غيشاركش مع المنتخب الأرجنتين فأولمبياد باريس 2024، وهذا الشي حسب معلومات توصل بها من محيط اللاعب الأرجنتيني اللي كيلعب دابا فإنتر ميامي المريكاني.
تقارير إعلامية أخرى، ربطت إمكانية غياب ليونيل ميسي على الأرجنتين فأولمبياد باريس، بالفريق ديالو أنتر ميامي المريكاني والأجندة اللي عندو الصيف الجاي، ونقلت تصريح سابق للمدرب ديالو تاتا مارتينو، واللي كان قال فتصريح له أنه ما عندوش مشكل يلعب ميسي مع الأرجنتين فكوبا أمريكا فشهر يونيو الجاي وأولمبياد باريس من بعدها فشهر يوليوز، ولكن المشكل هو أنه تدوز شهرين متابعين، وهذا الشي كيشوفو المدرب المذكور ماشي فمصلحة الفريق ديالو، الأمر اللي يقدر يخلي ليونيل ميسي يختار بين كوبا أميريكا وأولمبياد باريس، وبالإضافة لهذا الشي فكأس الدوريات اللي أنتر ميامي هو حامل اللقب ديالو غيبدا يوم 26 يوليوز الجاي أي من بعد يومين على افتتاح الألعاب الأولمبية.