الحشيش اللي شدو البارح وتقتل فيه بزناس طلع عندو علاقة بالحشيش لي لقاوه فسيدي رحال و"گود" جابت تفاصيل العملية

كشفات مصادر "گود" ،أن 10 طن ديال الحشيش لي تشدات لبارح من طرف لابيجي ديال بوليس من بعد معلومات دقيقة وفراتها لاديستي لقاو عندها علاقة مع 15 طن ديال الحشيش لي تشد هادي جوج سيمانات فسيدي رحال من طرف الدرك الملكي ،بحيت ان نفس الحمولة كانت بجميع الطوموبيلات سواء لي طاحو عند البوليس او الجندرام .
ووفق ما أكدات المصادر ديال "گود" ، فإن هاد المافيا ديال التهريب الدولي للمخدرات بعدما نجحات في وقت سابق من تجاوز الباراجات دازت لمرحلة تهز السلاح وتيري في المخزن باش تحمي السلعة وتوصل فأمان، من بعد ما دارت قالب جديد باش تتهرب من المراقبة بإلصاق لوگوات ديال شركات فها الطومبيلات .
وعلى حسب المعطيات المتوفرة ل "كود " فراه هاد السلعة اللي تم الحجز ديالها كانت جاية من منطقة القصر الكبير، و كانت غادا لجماعة المهاريز فالبير الجديد لشي إقامة تماك سميتها صافنا حيت قريبة بزاف من البحر غير شي 30 تانية وها انتا فالبحر .
المصدر نفسه تيضيف ان هذا المافيا ديال التهريب تتجند الناس اولاد لبلاد باش يخدمو معها مقابل إغراءات مالية كبيرة باش يتكون عندهم دراية بالمنطقة.