الركراكي: رحيمي ولا عاجبني.. عمرو ما هضر وكنضرب به المثال فالمنتخب

عبر الناخب الوطني وليد الركراكي على الفرحة ديالو حيث سفيان رحيمي رجع المنتخب المغربي، أكد أنه يستاهل حيث تألق فدوري أبطال آسيا، وقال أنه يضرب به المثل فالمنتخب المغربي.
وقال الناخب الوطني خلال الندوة الصحافية قبل ماتش المغرب وأنگولا: "سفيان رحيمي رجع بعدما سمع لي ميساج ديالي وكنفرح لهادشي وديما كنقولها ما عنديش مشاكل مع اللاعبين واللي كيستاهل خاصو يجي".
وكمل الركراكي: "سفيان رحيمي خدم ودابا عام ونص وماشي بزاف دونك خدم هاد المدة باش يرجع للمنتخب المغربي وكيستاهل، حيث بان فأحسن مسابقة اللي هي شومبيونزليگ".
ووضح الناخب الوطني: "ملي كتماركي فشومبونزليگ كيفما دار رحيمي واللي خدم وعمرو ما هضر هنا كتشوف لاعب كبير، وهو عمري سمعتو هضر وديما كيخدم/"
وأكد الركراكي: "دابا أنا خاصني نعطيه دقايق باش حتى هو يبين شنو عندو، غنشوفو واش غنعطيوها له فالماتش الأول أو الثاني ولكن قبل كلشي كنقوله برافو حيث عندو رغبة باش يرجع فالمستوى ديالو هذا الشي مزيان، وهذا هو الاگزامبل اللي بغيت نعطي فهاد المنتخب".