الدرس الجزائري لينا. بعدو الكورة من المشاكل الداخلية ديالنا وحميو اللعابة من كلشي وما يدخل للتوش غير المدرب واللعابة ومساعديه وعرفو باللي هادي غير رياضة

سالاو ماتشات المجموعة الرابعة من كأس افريقيا للامم بالكوت ديفوار بهزيمة ما كان حد يتوقعها للمنتخب الجزائري ضد موريتانيا بواحد لزيرو. هزيمة خرجاتو من هاد الكاس بطريقة مذلة بزاف. معاها سالى سيكل ديال مدرب بدا موهوب مع الجزائر وسالى بحال شي شمكار عاطيها غير للمعاطية٬ يتعلق الامر بجمال بلماضي اللي خبر لعابة ديالو البارح فالڤيستيار باللي استاقل من تدريب هاد المنتخب اللي كان ربح معاه كأس افريقيا للامم قبل دورتين وبالضبط فمصر 2019.
الجزائر اللي عندها لعابة كبار فالوسط والهجوم ولعابة متوسطين فالدفاع٬ كان يمشي بعيد فهاد الكاس٬ غير السياسة دخلات فكلشي. جينرالات الجزائر اللي حاكمين لبلاد رجعوهم عساكرية ماشي لعابة٬ كان شحن غير مسبوق ليهم وللجمهور وللاعلام. فانظمة عسكرية بحال الجزائر باش يكون الشحن فعال خاص يكون خضم خارجي يصوروه كمهدد للبلاد. الجينرالات ختارو المغرب وشخصنو هاد لبلاد ففوزي لقجع رئيس الجامعة الملكية المغربية لكرة القدم. خروج الجزائر ما كانش فماتش البارح ضد موريتانيا٬ كان قبل. كان من هزيمة هاد لبلاد ضد الكاميرون فاخر ماتش للتأهل لمونديال قطر باش تعادلو بواحد لواحد وتماركا عليهم بيت فاخر دقيقة.
من ديك الساعة وكل ما يقع للمنتخب رجعو المسؤولية عليه ماشي الكورة ولكن امور خارجية. مرة لاربيط. مرة لقجع. مرة المروك.....
العسكر شحن كلشي واثر على اللعابة فالتيران.
هادا درس كبير لينا فالمغرب. خاص كرة القدم تبقى رياضة. اييه قادرة تقوي الشعور الوطني وقادرة دير لحمة بين مكونات الشعب المغربي ولكن فاللخر راها غير لعبة. لعبة تحتامل الربح والخسارة والمفروض فيها الروح الرياضية. شفنا اتجاه فالمجتمع وحتى شي اطراف فالاحزاب باغية توظف هاد الرياضة لامور اخرى. باغي يمشي فالطريق الجزائري. هادا غادي كون كارثي على بلادنا.
راه نربحو كأس افريقيا او حتى كأس العالم ما غاديش يوصل نسبة النمو عندنا تفوت 7 فالمائة باش اقتصادنا يقدر يمتص البيطالة اللي عندنا.
باش المنتخب يبقى محصن ما خاص حتى شي حد ينزل عندو فالتيران من غير المدرب والطاقم ديالو واللعابة. ما خاص يكون حدا اللعابة حد باش ما يوقعش الضغط اللي وصل الجزائر لما وصلات ليه. اليوم قدر رئيس الجامعة يحمي لوطيل اللي فيه اللعابة فسان بيدرو من كلشي. كاين حراسة كبيرة لمقر اقامتهم. ما كيقرب حد. هاد الشي خاصو يستامر. مع الانتصارات كيكثرو اللي يبغيو يشوفو اللعابة. ممكن يكون هاد الشي ولكن بعد شي تأهل وفوقت قصير فلوطيل باش ما يشتت تركيز اللعابة
غير اللي عضو فالوفد المغربي الرسمي يبقى. من غيرهم يبقاو بعاد. بعد ما يسالي الماتش ممكن يدخل شي شخصية رسمية واخا من الاحسن ما يدخلوش گاع. يمشي عندهم للڤيستيار او لوطيل.
التجربة الجزائرية مهمة بزاف لينا. درس كبير لينا. راه شي وحدين باغيين يديونا لهاد الطريق. خاصنا نبعدو منها. خاص المنتخب يلعب وخاص الجمهور يعرف باللي يقدر يخسر كيف ما يقدر يربح. خاص يعرف باللي هادي رياضة واهم حاجة فيها هي الروح الرياضية اللي كتخليك تقبل بالنتيجة باش يصفر لاربيط وتقلب الصفحة وتبدا صفحة جديدة