لقجع حاضي لعابة المنتخب وما مخلي حد يقرب منهم. اخر واحد كينعس فلوطيل وديما كيدير دورة فنصاصات الليل

فوزي لقجع رئيس الجامعة الملكية المغربية لكرة القدم متوثر البارح واليوم اكثر من اللعابة. عايش مع اجواء الماتش الثاني للاسود اليوم بملعب السلام ضد الكوت ديفوار عن المجموعة الرابعة من كأس افريقيا للامم مصر 2019. لقجع حاضي اللعابة ديالو وبزاف. مانع شي حد يقرب منهم ولا يوصل ليهم ففندق “جي بابل يو ماريوت” القريب من مطار القاهرة والتيران اللي غاديين يلعبو فيه.
وفق مصدر “كود” فان لقجع ما كينعس حتى يحس باللي كلشي هو ها داك وكيدور بالليل بين الغرف ايلى كان شي صداع او مشاكل.
هاد لوطيل فيه غير اللعابة والمدرب والمساعدين ديالو. الادارايون ديال الجامعة عندهم فندق اخر باركين فيه.
اليوم لقجع كيف عاينات “كود” باغي الرباح ماشي التعادل. كيتسنى رباح باش يرتاح على باقي ماتشات هاد الكاس.
الرباح كتعني التأهل للدور الثاني وانت اللول وتبقى تلعب فالقاهرة وغادي تلعب فثمن النهاية مع منتخب جا الثالث فمجموعتو. يعني الطريق للربع قريبة بزاف
مدرب الكوت ديفوار كان قال البارح باللي منتخبو باغي يربح ولا ما ربحش ما غاديش يخسر