حتى لعاب مغربي ما كاين مع أحسن 11 لاعب فالجولة 2 من كوب دافريك بعد التعادل مع الكونگو

غابو اللاعبين المغاربة على أحسن تشكيلة ديال الجولة الثانية من دور مجموعات كأس إفريقيا لكرة القدم، وهي الجولة اللي تعادل فيها المنتخب المغربي واحد لواحد مع منتخب الكونگو الديمقراطية البارح الاحد فسانبيدرو.
واختار مؤشر صوفا سكور 11 أحسن لاعب للجولة الثانية من كروبات كوب دافريك، وهذه المرة أحسن تشكيلة ما فيها حتى لاعب المغربي، عكس الجولة الأولى اللي كانو فيها 2 لاعبين مغاربة مع أحسن تشكيلة وهما الكابيتان رومان سايس، وعز الدين أوناحي.
وتعادل المنتخب الوطني المغربي البارح الاحد مع منتخب الكونگو الديمقراطية واحد لواحد فماتش كان صعيب، خصوصا وأنه تلعب مع ال2 د النهار وسط جو حار ورطوبة طالعة بزاف، ودابا الأسود كيحتلو المركز الأول فالگروب 6 برصيد 4 النقاط، وتابعاه زامبيا والكونگو الديمقراطية ب2 نقاط، وتنزانيا بنقطة واحدة.