الزوات: تصريحات طلال بعد ماتش الوداد والماص كتمثل الوداد ومكونات النادي ما مختالفاش معها

أكد المهدي الزوات الكاتب العام للوداد الرياضي ان گاع الوداديين مع تصريحات الناطق الرسمي للنادي محمد طلال، اللي احتج من خلالها على التحكيم فماتش الفريق مع المغرب الفاسي، ضمن الدورة 12 من البطولة الإحترافية لكرة القدم.
وخرج المهدي الزوات فتدوينة على فيسبوك مساء امس الجمعة، وعلق تصريحات محمد طلال الناطق الرسمي للوداد، وقال: "نعم، تصريحات محمد طلال بعد نهاية المباراة ضد المغرب الفاسي تمثل المكتب المديري لنادي الوداد الرياضي، ولا أظن على أن أحداً من مكونات النادي يختلف مع مضامينها".
وتحدث محمد طلال الناطق الرسمي باسم الوداد بعد التعادل مع الماص واحد لواحد واحتج بقوة على التحكيم، وقال: " شكون اللي قاصد الوداد؟؟ إذا كان التوقيف أنا مستعد للتوقيف كيفما بغا يكون، ولكن بغينا شي واحد من هاد اللجنة اللي مخبي ورا الستار ومخدم التيليكوموند نشرفو شكون هو راه صعيب عليك تهاجم وصعيب تواجه فريق بحجم الوداد".
ووضح طلال: "هذا اكثر من الاستهداف وانا غندوي غير على الكورة واليوم فكورة القدم كنقول ان هذا الحكام ما كايناش سيمانة لعب لينا فتطوان كان گالس فكاميون فالفار وكيسير الفار، وما عيطش لهم باش يقول لهم كاينة ضربة جزاء واليوم كانت عندنا ضربة جزاء ضد الماص ثانية، يعطيها لنا ونزگلوها وما عندناش مشكل ولكن يعطينا حقنا".
وكمل طلال وقال: "راه اللي كيظن انه قادر يرجع الوداد كتكلاصا وكتاعب ثامنة وعاشرة ونلعبو لتنشيط البطولة واهم، حيث جميع المكونات الودادية ورا الفريق، حاولو يشتو هذا الفريق ولكن ما يقدروش وحنا الوداد وديما كنا كنحتارمو المؤسسات ومازالين كنحتارموها ولكن بغينا شي جواب ما بغيناهمش يخرجو يعطيونا التنقيط ويقولو بلي الحكم عندو الحق فهادي وفهادي وعندو الحق ما يعطيش ضربة جزاء.
وختم محمد طلال: "عندنا حتى حنا مستشارين ديالنا وعندنا التيليفونات راه كنتفرجو وكنتبعو داكشي فاللايف كيبان لينا ان هاديك ضربة جزاء لاغبار عليها، وحنا كنقولو اليوم من يسير لجنة التحكيم، شكون هذا يخرج يقول لنا كنسير وكيصيفطو لنا الحكام يتعلمو فينا صيفطوهم للدوزيام ديفيزيون ولا للتروازيام ديفيزيون، اما ما غندويش على الأشخاص، أنا كندوي على لجنة التحكيم".