واش حدقة غادي يبقى عند كلمتو ويوقف حكم ديربي فاس؟ أعضاء المديرية ضاربين الطم

المهزلة التحكيمية اللي ترتكبات فماتش ديربي فاس، اللي جمع المغرب الفاسي والوداد الفاسي وضعت مديرية التحكيم واللجنة المركزية للتحكيم في موقف حرج.
الفيديو، الذي انتشر على نطاق واسع وكياكد فيه الحكم جلال جيد أنه ما احسبش جوج البيلانتيات للماص، خلا المديرية مضطرة باش تستدعي الحكم لاجتماع عاجل من أجل الاستمتاع إلى أقواله.
يحي حدقة، مدير مديرية التحكيم، سبق أن أكد في تصريحات صحافية أنه ما غاديش يتساهل مع أي حكم تبث أنه أخطأ في حق فريق معين.
إذن واش حدقة غادي يبقى عند كلمتو ويوقف الحكم جلال جيد، خصوصا أن الماص كان الأقرب إلى الفوز لو احتسب الحكم ضربتي جزاء.
المديرية غادي تكون ملزمة باتخاذ قرار بشأن الحكم، خصوصا بعدما توصلت برسالة من مكتب الماص كيحتج فيها على الظلم اللي تعرض ليه فريقه أمام الواف فالملعب الشرفي بمكناس.
“كود” حاولت الاتصال بأعضاء المديرية واللجنة المركزية للتحكيم، باش تعرف منهم 0ش واقع، لكنهم مكايجابوش على التلفون ربما ما بقى عندهم ما يدگال، لهذا ضاربين الطم حتى تدوز هاد الزوبعة.