الركراكي: جائزة احسن مدرب كنهديها لسيدنا وكنشكرو هو والقجع واللاعبين والمغاربة وغنتقاتلو باش نفرحوهم فكوب دافريك

عبر الناخب الوطني وليد الركراكي على الفرحة ديالو حيث ربح جائزة احسن مدرب أفريقي 2023، وهداها للملك محمد السادس وشكرو وشكر فوزي لقجع رئيس الجامعة الملكية المغربية لكرة القدم واللاعبين والجماهير المغربية، ووعدهم باش يتقاتلو هو والأسود ويفرحوهم فلاكوب دافريك المقبلة بالكوت ديفوار.
وتحدث الناخب الوطني فتصريح بعدما خدا جائزة احسن مدرب فالقارة الأفريقية لعام 2023، فحفل الكاف بمراكش وقال: "الجائزة كنهديها لسيدنا هو الاول وللمجهودات والرؤية اللي عندو على المغرب وأفريقيا والكورة والشباب المغربي وكيعطينا كلشي باش نجحو وكنشكر حتى رئيس الجامعة فوزي لقجع واللاعبين والشعب المغربي اللي ديما مساندنا كيفما فكاس العالم وكيتسناو منا ديما نعطيو كلشي وكنقولهم شكرا حيث داكشي للي دوزناه معهم عمرنا غنساوه".
واكد وليد الركاركي: "دابا جايا كاس أفريقيا وبغنيا نفرحو الشعب المغربي اللي كيتسنى هاد كاس أفريقيا وما غتكونش ساهلة، ولكن أنا عارف اللاعبين ديالنا غيعطيو الجهد ديالهم باش يفرحو البلاد".