الركراكي: غنمشيو لكوب دافريك فالكوت ديفوار باش نربحو الكاس

أكد الناخب الوطني وليد الركراكي، أن المنتخب الوطني المغربي غيشارك فكأس إفريقيا باش يربح اللقب، ولكن هذا الشي كيجي بالخدمة والتقاتيل.
وتحدث وليد الركراكي بعدما ربح المغرب ليبيريا فإقصائيات كاس إفريقيا، البارح الثلاثاء، وقال: "لوبجيكتيف ديالنا فكوب دافريك هو نربحوها وقلناها، وما كاينش شي فريق ما بغيش يديها، راه مشينا لكأس العالم وقلنا باش نديوها".
ووضح الركراكي وقال: "ملي كنقولو غنديوها كيعني غنديرو كلشي باش نديوها، وغيكونو صعوبات وما غتكونش ساهلة، ولكن غنديرو جهدنا كامل باش نفرحو الشعب ديالنا وهاد الشي اللي كيهمنا، وإلا عطينا جهدنا كامل غنكونو فريق صعيب يخسر".
وليد الركراكي شدد على أن الجيل الحالي فليكيب ناسيونال يقدر يحقق إنجاز فالكان، وقال: "كنتيق فهاد الكروب وتايق بلي غنديرو شي حاجة فالكوب دافريك إلى بقات عندنا العقيلة اللي كانت من قبل".