الوداد طواو صفحة البطولة ومركزين على ماتش لاسيك والرباح فالشومبيونزليك وها جديد الحمرا فالكوت ديفوار

طواو الوداد الرياضي صفحة البطولة الاحترافية، والفريق بدا كيركز دابا على دوري أبطال افريقيا والماتش المهمة ديالو فالكوت ديفوار ضد أسيك ميموزا الإيفواري.
الوداد الرياضي وبعدما وصلو نص الليلية الماضية إلى العاصمة الايفوارية ابيدجان، ومشاو للفندق ديالهم يرتاحو، غيديرو اليوم الخميس فالعشية اول حصة تدريبية فالكوت ديفوار، باش يبداو يوجدو للماتش ضد أسيك ميموزا.
المدرب عادل رمزي ولاعبين الوداد الرياضي عارفين المسؤولية اللي عليهم، وانهم خاصهم يخرجو من نفق النتائج السلبية اللي دخلين فيها مدة هادي، داكشي علاش رمزي والطاقم التقني واعين بلي خاصهم يخدمو على الجانب الذهني والنفسي ديال اللاعبين.
الحصة التدريبة ديال الوداد الرياضي الاولى فالكوت ديفوار غتكون فواحد التيران صغير ديال التداريب قريب للفندق فين باركين فأبيدجان، وغدا الجمعة عاد غيتدروبو فتيران فيليكس بواني اللي غيتلعب فيه الماتش يوم السبت الجاي.