الركراكي غيهضر مع المغاربة من الكوت ديفوار

غيهضر الناخب الوطني وليد الركراكي مع الجماهير المغربية قبل من الماتش أميكال بين المنتخب الوطني المغربي والكوت ديفوار، اللي غيتلعب السبت الجاي فأبيدجان.
وبرمج الاتحاد الإفواري لكرة القدم، ندوة صحافية قبل الماتش بين المغرب والكوت ديفوار، وغتكون الجمعة الجاية مع الرابعة ونص ديال العشية فالكوت ديفوار اللي هي الخامسة ونص بالتوقيت المغربي.
ومن بعدما يدير وليد الركراكي الندوة الصحافية ديالو، غيمشي يشرف على الحصة التدريبية الأخيرة للمنتخب الوطني المغربي قبل الماتش، واللي غتكون فتيران ستاد فيليكس بواني فأبيدجان وغتبدا مع 5 العشية د الكوت ديفوار وهي 6 لعشية مغربية.
للإشارة، فالناخب الوطني وليد الركراكي ما دارش ندوة صحافية ملي بغى يعلن على اللائحة ديال المنتخب المغربي فالمعسكر الحالي، وحطات الجامعة الملكية المغربية لاليست فالموقع ديالها.