الأشبال بداو مونديال U17 مزيان: ربحو باناما فأول ماتش وتصدرو الكروب الأول

افتتح المنتخب الوطني المغربي لأقل من 17 عام، مونديال U17 بأندونيسيا بالرباح، بعدما فاز اليوم الجمعة على منتخب باناما، ضمن الجولة الاولى من المنافسات.
وسالا الماتش بين المنتخب الوطني المغربي والمنتخب البانامي بنتيجة 2 لزيرو، وماركا الهدف الأول اللاعب سيف الدين شلاغمو فالشوط الأول، وهو الشوط اللي ضيعو فيه اللاعبين المغاربة بزاف من فرص التسجيل وكان ممكن يندمو عليها.
أما الشوط الثاني استحوذ عليه المنتخب البانامي وكان خطير بزاف والكول المغربي طه بلغوزيل والمدافعين المغاربة تحملوا عبء الماتش، حيث ضغطو فيه الباناميين بشكل كبير، قبل ما يتمكن أيمن الناير اللي دخل كبديل من ضمان الرباح لليكيب ناسيونال بهدف ثاني قاتل فالوقت بدل الضائع من الماتش.
وبهذا الرباح قدر المنتخب الوطني المغربي ياخد اول 3 بوان من أول ماتش فمونديال U17، وهذا الشي خلاه يتصدر الكروب الاول، في انتظار الماتشات الجايين، وغيلعبو الاشبال فالجولة الثانية ضد منتخب الإكوادور الاثنين الجاي، وبعدها ضد إندونيسيا مستضيفة البطولة.