عادل رمزي: الوداد أكبر فريق فإفريقيا والمغرب وها غياباتنا ضد انييمبا

أكد عادل رمزي مدرب الوداد الرياضي أن الواك هو أكبر فريق فلافريك والمغرب داكشي علاش هو اللي خاص ينطلق ويدير المبادرة ضد الخصم وهذا، وكشف أن كلشي اللاعبين واجدين لمواجهة انييمبا النيجري فإياب ربع نهائي السوبر ليك، بإسثناء حمدو الهوني اللي ممكن يغيب.
وتحدث عادل رمزي فالندوة الصحافية اللي كتسبق ماتش الوداد وانييمبا وقال: "حنا أكبر فريق فإفريقيا والمغرب وبالتاريخ مفروض علينا ننطلقو من القوة ديالنا ونبادرو ولكن بعقلانية وبتواضع ومنقولوش راه حنا كذا وكذا، ولكن نخدمو حيث باقي ما وصلنا لوالو ونحاولو نوصلو للمستوى الكبير".
وكمل مدرب الوداد وقال: "خاصنا نتيقو فريوسنا باش نوصلو لداكشي اللي بغينا أي ماتش كندخلو نلعبو فيه على الرباح وهذا الشي اللي غنديرو غدا خاصنا نكونو مركزين ومن بعد ليسيناريو ديال ليماتش راه كنشوفوهم على حساب مجريات المباراة كيف مشات".
وبخصوص الإصابات قال عادل رمزي: "بالنسبة للإصابات، كلشي مزيان كاينين لاعب ولا جوج اللي فيهم بعض الشك واش غيشاركو أو لا، وغنقررو هذا الشي مع الدكتور ديالنا والكلام هنا على حمدو الهوني اللي عندو شكوك واش يلعب".