رمزي: ممكن إنييمبا يتسيفو فماتش الروتور ولكن دورنا نوجدو لهم وقوة الوداد فالجمهور ديالو اللي كيدعمنا وحنا عائلة

أكد عادل رمزي مدرب الوداد الرياضي أن ماتش إياب ربع نهائي السوبر ليك الإفريقي غدا الخميس فستاد دونور، ضد إنييمبا النيجيري غيكون مختلف على ماتش الذهاب، وان جمهور الواك عندو دور مهم فالمباراة.
وتحدث عادل رمزي فالندوة الصحافية اللي كتسبق ماتش الوداد وإنييمبا وقال: "لعبنا ماتش مع إنييمبا فنيجيريا وحتى هما عندهم مدرب اللي غيدير لينا الفيزيوناج، ويحلل طريقة اللعب ديالنا وحنا حنا كنديرو نفس الحاجة".
وكمل رمزي: "ممكن يكون سيناريو مختلف على ماتش الذهاب، يقدر يجي فريق إنييمبا بطريقة لعب اخرى وهادي مسألة كتخصهم، بالنسبة لينا حنا خاصنا نكونو واجدين".
وشدد عادل رمزي: "الثقة كتكبر عند اللاعبين ديالنا وكينسجمو كثر مع الطريقة اللي باغيين نلعبو بها، وهادشي لاحظناه فالبطولة والكومبتيسيون انتر ناسيونال مختلفة حيث فيها ظروف اخرى العامل البدني والسفر وغيرها.
ووضح رمزي: "وخاصك تحافظ كمدرب على التوازن ما بين النتيجة والأداء، الهدف ديالنا يكون بجوج مزيانين الأداء والنتيجة ومازال ما وصلناش لداكشي اللي بغينا وخدامين عليه وهدفنا نفرحو جمهورنا".
عادل رمزي اعتبر أن قوة الوداد فالجمهور ديالو، وقال: "الدعم ديال الجمهور ديالنا هو قوتنا واللاعبين ديالنا كيعتبروه دفعة معنوية باش كيحققو الفرحة، جمهورنا كبير وكلنا عائلة وحدة ونحاولو ما أمكن نكونو فالمستوى ونفرحوهم".