الوداد بداو كيستعدو لإينييمبا وعادل رمزي كيوجد اللاعبين فأجواء زوينة

خدامين الوداد الرياضي كيوجدو لماتش ذهاب ربع نهائي السوبر ليك الإفريقي، أمام إينييما النيجيري، اللي غيتلعب فنيجريا الأحد الجاي.
ودخلو لاعبين الوداد الرياضي قبل لحظات فحصة تدريبية هي الأولى فهاد السيمانة، برمجها المدرب عادل رمزي فبروكرام استعدادات الواك لمواجهة إينييما، واللي غيوجد فيه الفريق فبنجلون فكازا من اليوم حتى يسافر الخميس الجاي إلى نيجريا باش يلعب الاحد ضد الفريق النيجري ويرجع مباشرة للمغرب يوجد لماتش الروتور.
والحصة التدريبية ديال الوداد الرياضي فيها أجواء حماسية واللاعبين اللي كاينين مركزين دابا على الماتش ضد اينييمبا، فانتظار يرجع عطية الله والعملود من المنتخب المغربي، وكذلك يرجعو المصابين صامبو وزولا يتدربو مع الكروب.
وكيسعى عادل رمزي مدرب الوداد الرياضي إلى استغلال التوقف الدولي د الفيفا، باش يوجد الفريق ويرفع من لافريشور فيزيك عند اللاعبين، مع العلم أنه ناجح حتى لدابا فتدوير الفريق وخلق توازن فليماتش واخا الغيابات اللي كتكون.