بانو كبار.. الرجاويين خلاو الكلاشات وصراع التيرانات وواقفين مع الوداديين بسبب كسيدة فلوح وها جديد حالتو

الصراع على الكورة والكلاشات فالتيرانات، ما منعوش جماهير الرجاء الرياضي من الوقوف مع أنصار الوداد الرياضي، فالوقت الصعيب اللي كيدوزو منو بعد الحادث اللي تعرض له لاعب أسامة فلوح.
وخرج أكبر موقع ديال أنصار الرجاء الرياضي "DimaDima Raja" وعبر على التضامن ديالو مع أسامة فلوح لاعب الوداد الرياضي، ونشر على الباج د الموقع الرجاوي ففيسبوك تدوينة مساندة للاعب الودادي ودعاو معه بالشفاء.
وفاقت جماهير الودادي الرياضي ومعه جماهير الكورة المغربية على صدمة تعرض لاعب الواك أسامة فلوح لكسيدة خايبة، بعدما دخل هو 2 صحابو بطونوبيل فرموك.
وحسب أخر المعلومات فاللاعب كاين دابا فالعناية المركزة فكلينيك فكازا، وحالتو صعيبة بزاف وعندو كسور ونزيف كيحاولو الأطباء يوقفوه ويخرجو اللاعب مول 24 عام من هذه الحالة الصعيبة.
من جتهو، واقف سعيد الناصيري رئيس الوداد الرياضي مع اسامة فلوح وعائلتو فهاد المرحلة الصعبة، وصيفط محمد طلال عضو المكتب المديري للنادي للكلينيك باش يساعد عائلتو ويسهر على توفير أي حاجة خاصا اللاعب ويوصل له مستجاد الحالة ديالو أول بأول.