تفاصيل كسيدة لاعب الوداد أسامة فلوح: ناعس فالكلينيك وحالتو صعيبة

فاقت جماهير الوداد الرياضي صباح اليوم الأربعاء على وقع حادث سير خطير، الضحية ديالو لاعب الفريق أسامة فلوح.
وحسب المعلومات المتوفرة، فاللاعب أسامة فلوح كاين دابا فحالة صحية صعيبة بزاف، وناعس فواحد المصحة فوسط مدينة الدار البيضاء، وكيدارو له الفحوصات الطبية باش يعرفو شنو عندو بالضبط ونوع الإصابات اللي كيعاني منها والعلاج اللي خاصو، وراه عائلتو كاينين فالكلينيك معه وكيجريو به.
وبالرجوع لتفاصيل الكسيدة، فأسامة فلوح مول 24 عام لاعب الوداد الرياضي، كان فطوموبيل هو 2 صحابو فالساعات الأولى من صباح اليوم الأربعاء ودخلو فرموك كان واقف فالشارع نواحي عين السبع فكازا، قبل ما يتم نقلهم للسبيطار ومنو للكلينيك.