ها الحالة الصحية ديال الأسطورة أحمد فرس من بعدما خضع لعملية جراحية اليوم فكازا

خضع أسطورة كرة القدم المغربية أحمد فرس اليوم الاثنين، لعملية جراحية بإحدى مصحات مدينة الدار البيضاء من بعدما تزاد عليه الحال مؤخرا.
وحسب مصدر مطلع، فالعملية الجراحية اللي خضع لها أحمد فرس النجم السابق للمنتخب الوطني المغربي وفريق شباب المحمدية تكللت بالنجاح، وراه عطاه الطاقم الطبي اللي كيشرف على العلاج ديالو يبقى هاد الايام الجايا فالانعاش تحت المراقبة الطبية حتى يولي بخير ومن بعد يقدر يغادر المصحة.
وكان أحمد فرس عيا بزاف فالأيام اللي فاتت بسبب المرض الشي اللي خلاه يشد الفراش، وبزاف من الجماهير المغربية تعاطفو معه خصوصا وأنه من اللاعبين اللي صنعو تاريخ كرة القدم المغربية من خلال التتويج بكأس إفريقيا الوحيدة فكرة القدم المغربي عام 1976، إضافة إلى أنه أول لاعب مغربي ربح الكرة الذهبية.