رئيس هافيا حيح بالفرحة بعد التعادل مع الوداد وكيواعد بالرباح فكازا والرجوع بالتأهل لغينيا

بداو كوناكري الغيني كيوجدو لماتش الروتور ضد الوداد الرياضي، برسم دور 32 من عصبة أبطال إفريقيا، وباغيين يجيو يديرو المفاجأة فالمغرب وطامعين فالتأهل واخا هذا الشي صعيب بالنظر للفرق فالإمكانيات بين الفريقين.
ونشر هافينا كوناكري فيديو اليوم الاثنين، لرئيس الفريق كريفال كامارا بعد نهاية ماتش البارح مع الوداد الرياضي والتعادل واحد لواحد، فتيران الجنرال لاسانا كونطي فالعاصمة الغينية كوناكري، وهو كيموتيفي اللاعبين ديالو.
ودخل رئيس هافيا للفيستيير ديال الفريق، وكيبان ناشط فالفيديو وفرحان بالتعادل مع الوداد، وبدا كيخطب على اللاعبين ديالو وكيواعدهم بالرباح والتأهل فماتش الروتور اللي غيتلعب فكازا يوم 30 شتنبر.
وقال كامارا للاعبين ديالو وهو كيغوت: "غنمشيو لكازا بلانكا ونربحو ونجيبو التأهل لكوناكري.. خاصنا نديرو ماتش كبير راه الغنيين كاملين كيثيقو فيكم ووراكم".
للإشارة، فهافيا كوناكري إذا بغا يتأهل إلى دور المجموعات من عصبة أبطال إفريقيا، خاصو يربح الوداد الرياضي بهدف واحد لزيرو على الأقل أو يتعادل معه جوج لجوج، وهذا الشي صعيب بزاف خصوصا وأن الماتش فكازا وقدام جمهور الوداد اللي كيخلع خصوم كبار فإفريقيا فما بالك بفريق بحال هافيا اللي يالاه كيكتشف المسابقات الإفريقية.