الوداد واجدين لماتش هافيا.. المورال طالع عند اللاعبين وباغيين يرجعو بالرباح من غينيا

سالا الوداد الرياضي الاستعدادت ديالو لماتش غدا الاحد فغينيا، ضد فريق هافيا كوناكري الغيني برسم ذهاب الدور 32 من عصبة ابطال افريقيا.
ودارو الوداد الرياضي اليوم السبت فالعشية، اخر حصة تدريبية قبل من ماتش هافيا كوناكري، وكانت الحصة فتيران الجينيرال لاسانا كونطي فالعاصمة الغينية كوناكري.
وعرفت الحصة التدربية مشاركة جميع اللاعبين 24 اللي فلاليست د المباراة، والاجواء كانت زوينة والمورال طالع، وخدم معهم المدرب عادل رمزي والطاقم ديالو على وضع اخر اللمسات قبل الماتش، وعلى طريقة اللعب والنهج التكتيكي.
وغيلعب الوداد الرياضي ذهاب الدور 32 من عصبة ابطال افريقيا مع هافيا كوناكري الغيني فغينيا، وباغي يرجع بشي نتيجة ايجابية تسهل عليه ماتش الروتور هنا فالمغرب يوم 30 من هذا الشهر.