شنو واقع للبؤات؟ خسرو الماتش الثاني مع زامبيا وبگوفة ديال البيوتا

طاح المنتخب الوطني المغربي النسوي، طيحة خايبة بخسارة كبيرة اليوم الثلاثاء فتيران مولاي الحسن فالرباط، أمام منتخب زامبيا فماتش أميكال ثاني بين المنتخبين بعد الخسارة فالماتش الأول مع نفس الخصم.
وسالا الماتش بين المنتخب الوطني المغربي العيالات ومنتخب زامبيا بنتيجة 6 لجوج لمصلحة الزامبيات، وسط علامات استفهام كثيرة حول أسباب تراجع مستوى اللبؤات بعد شهرين فقط على التألق ديالهم فكأس العالم للسيدات فأستراليا، مع العلم أن المنتخب الزامبي ودع مونديال العيالات من الدور الأول، والمغربيات وصلو لثمن النهائي، ولكن وللماتش الثاني بين الجانبين بان الفرق فالنيفو بين المنتخبين، حيث اللبؤات لقاو مشاكل كثيرة والتمريرات ديالهم كانت أغلبها مقطوعة وعندهم الديشي بزاف، بالإضافة لسوء التغطية، وبالمقابل كانو الزامبيات لاعبين مزيان وعندهم اللياقة البدنية مزيانة وكيستغلو أغلاط اللاعبات المغربيات.
الخسارة الكبيرة للمنتخب الوطني المغربي النسوي اللي كيشرف عليه الفرنسي رينالد بيدروس، فماتش اليوم أمام زامبيا كتجي بعد 4 أيام فقط من الخسارة أمام نفس الخصم فكازا بنتيجة 2 لزيرو.