اللبؤات غيلعبو مع زامبيا فالبيرجيكو فكازا وتيران مولاي الحسن فالرباط

غيلعب المنتخب الوطني المغربي جوج ماتشات وديين، خلال العشرة أيام الأخيرة من شهر شتنبر الجاري، استعداد للاستحقاقات المقبلة.
وغيدخل المنتخب الوطني المغربي تجمع إعدادي فمركز محمد السادس لكرة القدم، استعدادا لمواجهة منتخب زامبيا فجوج ماتشات وديين، وداكشي علاش عيط الناخب الوطني رينالد بيدروس على 26 لاعبة.
وغيتلب الماتش الأول بين المنتخب الوطني المغربي النسوي وزامبيا يوم 22 شتنبر فتيران البيرجيكو فكازا مع 7 لعشية، والماتش الثاني غيتلعب فتيران مولاي الحسن فالرباط يوم 26 شتنبر وحتى هو مع 7 لعشية.
وهاد جوج ماتشات هما الأولين للمنتخب الوطني المغربي النسوي، بعد المشاركة ديالو التاريخية فكأس العالم للسيدات الأخيرة قبل أسابيع فأستراليا ونيوزيلاندا، واللي تكاليفاو فيها لثمن النهائي فأول مشاركة مغربية فكوب ديموند.