دونور غيبقى محلول للوداد فالسوبر ليك

غيبقى ملعب المركب الرياضي محمد الخامس بالدار البيضاء محلول حتى يسالي فريق الوداد الرياضي من منافسات السوبر ليك الافريقي.
مسؤولين الوداد الرياضي ومجلس مدينة الدار البيضاء وشركة "صونارجيس" اللي تسلمت ملعب مركب محمد الخامس بالدار البيضاء باش تصلحو وتسيرو، توصلو إلى اتفاق باش الفريق الاحمر يستفاد من ستاد دونور حتى يسالي مسابقة السوبر ليك الافريقي.
الاتفاق اللي كانو فيه حتى مسؤولين عن الرجاء كيقضي باش غتبدا الاشغال يوم 1 أكتوبر الجاي فالتيران، وغيبقى محلول باش يلعبو فيه الوداد والرجاء حتى يوم 30 أكتوبر، وبالنسبة للواك غيبقى يلعب فيه حتى يسالي الماتشات ديالو فالسوبر ليك الافريقي.
وغتبدا منافسات السوبر ليك الافريقي يوم 20 أكتوبر الجاي بإجراء ماتش ذهاب ربع النهائي بمشاركة 8 فرق من بينها الوداد الرياضي، والفينال غيكون يوم 11 نونبر الجاي.